3.10.24

XORNADA DE MOBILIZACIÓN POLO CLIMA

O pasado 26 de setembro celebramos unha Xornada de Mobilización polo Clima, para así coñecer a importancia de protexer o Medio Ambiente e actuar de maneira responsable contra o cambio climático. 

Os nenos e nenas de Espiñeira sabemos que nós podemos marcar a diferencia, por iso queremos compartir todas as actividades que fixemos.

Limos unha carta/ manifesto sobre os efectos do cambio climático e o conto "Unha mensaxe nunha botella", co cal aprendimos que reciclar é esencial para combatir o cambio climático.

Tamén nos convertemos en expertos da reciclaxe facendo un xogo de relevos, no que tiñamos que depositar os envases de lixo no seu lugar correspondente.









Con todos os envases, convertémonos en artistas e creamos a nosas propias "obras de arte". Dándolle un segundo uso a todo ese lixo que reciclaramos.



Ademais, debatemos sobre diversas curiosidades relacionadas cos temas ambientais: cambio climático, reciclaxe, microplásticos, etc. Con tarxetas informativas de "Sabías que..."

Como por exemplo...
  • Sabías que... as tartarugas mariñas confunden as bolsas de plástico coas medusas e, ao comelas, poden enfermar?
  • Sabías que... se reciclamos 1 soa botella de vidro, aforramos suficiente enerxía para que unha bombilla de 100 vatios funcione durante 4 horas?
Por último, fixemos unha actividade de peche e todo o cole reunímonos no patio para cantar a nosa "canción polo clima" e representamos entre todos e todas o símbolo contra o cambio climático:


O círculo representa a Terra e os dous triángulos representan un reloxo de area. Servindo coma advertencia de que o tempo se está acabando para algunhas especies. E nós podemos axudalas reciclando, reutilizando e coidando o planeta.

Axúdasnos?

30.9.24

PARA FACER ESTE VIÑO TIVEMOS QUE IR VENDIMAR!!!

O pasado venres o alumnado de Educación Infantil, convertéronse en auténticos vendimadores, dando comezo ao noso Proxecto Documental Integrado deste curso titulado "A Intelixencia Artesanal".

Ó entrar no cole atopámonos con que os corredores das aulas de E.I. estaban cambiados... Que estaba pasando?

  

Pero aínda había máis sorpresas... 

En Vilapeques apareceu unha vide con uvas de diferentes tipos....

Así que puxémonos mans a obra e comezamos a recoller as uvas como auténticos vendimadores...





   

Tamén as clasificamos segundo a súa cor e tipo (treixadura e  albariño, catalán "neghro" e catalán "roxo")...
   
A continuación, descalzámonos e comezamos a pisar os tres tipos de uvas, cada un no seu capacho, tal e como se facía hai moitos anos... Que sensación, sentir as uvas nos nosos pes...
 
   Xa por último, colamos e prensamos os distintos tipos de uva... 

E fixemos un mosto, que nos quedou moi saboroso... E que por suposto, probamos antes de que comezara a súa fermentación...

E ata aquí... toda a nosa experiencia en contacto cos oficios de antes:"Os vendimadores de Espiñeira"
Comezando a traballar deste xeito co noso PDI "A Intelexencia Artesanal".

27.9.24

BIBLIOTECA PÚBLICA DE ALDÁN

Como vén sendo habitual, en cada curso escolar non pode faltar a nosa visita á biblioteca pública de Aldán, a cal acudimos andando xa que se atopa a 15 minutiños da nosa escola. Durante a andaina sempre xorden momentos máxicos e anecdóticos: encontro con familias, avistamento de cabalos, lugares con encanto...

A visita á biblioteca sempre é de agrado para o noso alumnado e, boa parte do entusiasmo xerado é debido á bibliotecaria Isa, a cal, sempre nos recibe con entusiasmo e ilusión.



Tivemos tempo para facer carnés de usuario para aquelas nenas e aqueles nenos que non o tiñan, para realizar o empréstito de libros e para gozar dunha sesión de contacontos.

A estancia nas dependencias aproveitámola para inicial o proxecto documental integrado que dende a biblio impulsamos sobre a intelixencia artesanal, cuxo título e logo final resolverase na conmemoración do Día das Biblliotecas, o vindeiro 24 de outubro do 2024. Así, recompilamos bibliografía sobre a vendima, que será o primeiro proxecto que levará a cabo o alumnado de infantil en consonancia co PDI da escola.

Por último, tivemos tempo de ir desfrutar do parque de Aldán, atopado xusto enfronte da biblioteca da parroquia.





E ata aquí chegou a nosa aventura explorando os recursos e recunchos da nosa contorna! 
💚
Xa estamos un pouco máis preparadas e preparados para iniciar o noso proxecto sobre un dos oficios artesanais típicos da zona e desta época do ano como é a vendima. 

Ata pronto miñas lectoras e lectores!
Espiñeiriña.

18.6.24

5 de xuño, DÍA DO MEDIOAMBIENTE coa CEMMA

Este curso decidimos celebrar o Día do Medioambiente acudindo a un dos ecosistemas próximos ao colexio: a praia de Areacova. Os nenos e nenas da Espiñeira somos moi conscientes da fraxilidade do medio mariño, que tantas ameazas vén sufrindo nos últimos tempos: plásticos, sobrepesca, verquidos, intenso tráfico mariño... Pero tamén somos conscientes da inmensa e fermosa biodiversidade que albergan. Entre os animais que máis nos gustan están os cetáceos (golfiños e baleas). Para coñecer un pouco mellor a estes xigantes do mar e saber como poder axudalos en caso de varamento, convidamos aos técnicos da CEMMA (Coordinadora para o Estudo dos Mamíferos Mariños de Galicia).
A CEMMA leva máis de 30 anos adicada ao estudo, divulgación e conservación dos mamíferos mariños, tartarugas mariñas e quenllas. Contan cunha ampla experiencia en rescate e auxilio destes animais e tamén no seguemento e rexistro das especies oceánicas que pasan preto das nosas costas. Así, neste solleiro día de celebración da protección do medioambiente,todo o cole quixo achegarse á praia e vivir en directo coma os biólogos da CEMMA fan o seu traballo.

Antes de saír para a praia, os nenos e nenas de infantil escoitamos un contacontos na biblioteca e coñecemos aos protagonistas desta xornada: os golfiños, as tartarugas mariñas e os lobos mariños. Paseniñamente, todos os nenos e nenas dos restantes cursos fomos saíndo cara Areacova e alí participamos nun simulacro de rescate de golfiños, focas e tartarugas.
Aprendemos moito da súa bioloxía e comportamento, pero sobre todo, aprendemos como debemos comportarnos se atopamos un destes animais desorientado ou varado na praia e a quen temos que chamar para axudalo: sempre ao 112, para que avisen á CEMMA!

29.5.24

RECREOS NA BIBLIO!

Bos días queridas e queridos lectores!

Como ben sabedes, os martes e os xoves son días de recreo na biblio! 📚
Dende comezo de curso as axudantes, alumnas voluntarias que están interesadas en colaborar na organización e dinamización da biblio, realizaron con iniciativa moitísimas propostas en prol da biblioteca e da lectura.


Esta semana, quixeron agasallar ó alumnado de educación infantil cun contacontos do seu interese. Desta maneira, deixaron na man dos máis cativos e cativas a elección do conto: Capitán Verdemán de Ellie Bethel e Alexandra Colombo 💚

O alumnado mantívose moi atento ante o gran relato que fixeron do mesmo.


Ademais, foron as axudantes as que organizaron os espazos e a distribución dos máis pequenos para que se sentisen cómodos.

Por último, agasalláronos cunha bonitiña figura que elas mesmas troquelaron e, con este fermoso detalle, concluíron a sesión.



Esta é tan só unha pequena mostra do que levades feito este curso! 

Dende o equipo de biblioteca queremos darvos as grazas pola vosa dedicación e entusiasmo como bibliotecarias! Estades facendo un gran traballo! 😃

Un saudiño e ata a próxima navegantes!