DÍA DOS OCÉANOS: UN MAR DE SORRISOS!

O pasado venres celebramos o Día Mundial do Medio Ambiente e o Día Internacional dos Océanos, conmemoracións estreitamente ligadas co noso Proxecto Documental Integrado Do mar nace o azul da vida.

Foi unha xornada máxica onde o alumnado, as familias e profesorado uníronse para dar peche a este gran proxecto dunha maneira especial.

- Queredes saber e contemplar todo o que fixemos? Preparádevos porque non faltou a creatividade, as experiencias, a música nin a literatura!

ALFOMBRAS NATURAIS: A NOSA ARTE MARIÑEIRA

Comezamos o día sacando o noso lado máis artístico. Cun pouco de imaxinación e moitos elementos da natureza (follas, area, cunchas, pedras...), o alumnado creou unhas alfombras espectaculares inspiradas na contorna mariña, poñendo como protagonistas ao noso cabaliño de mar, é dicir, a min mesma, a vosa mascota Espiñeiriña, e a personaxes literarias como Bernardino Graña (Poeta do Mar cangués) e Rosalía de Castro.

MÚSICA E TRADICIÓN NA CARBALLEIRA

Sumerxímonos na tradición popular galega cantando as cancións do Cancioneiro mariño. Familias, alumnado e mestras/es interpretamos os seguintes temas: A cana verde, Ghavota ghavota, Na beira do mar, A Rianxeira, Catro Vellos Mariñeiros, Polo mar abaixo (Os de Marín) e O Rodaballo. Velaquí algúns dos momentazos:

APADRIÑAMENTO LECTOR: HISTORIAS QUE UNEN

Vivimos un momento precioso de convivencia grazas á literatura. Deste xeito, organizamos agrupamentos de 3 alumnos e alumnas onde os maiores narrábanlle as historias que se atopaban nos diferentes fondos literarios relacionados co mar e seleccionados para a ocasión nun ambiente envidiable como é o da nosa carballeira.

EXPOSICIÓN "DO MAR NACE O AZUL DA VIDA": MATERIAIS CREADOS, ACTIVIDADES E AUDIOVISUAIS.

As familias puideron desfrutar dunha exposición sobre o PDI e observaron os distintos materiais e actividades realizadas ao longo do curso, a mostra fotográfica e un video resumo das experiencias vividas. 

Ademais, tiveron a oportunidade de poñer en práctica os seus coñecementos sobre flotación guiados polos máis pequerrechos do cole.

Por último, quería engadir que hoxe día 8 de xuño, o propio Día dos Océanos, o alumnado de infantil puido gozar dunha sesión de contacontos sobre o libro "La vida que se da" de Claudia Prado González, narrado e interpretado pola autora e a súa filla! Moi agradecidos pola vosa visita! 😍 Ademais, houbo un obradoiro posterior onde o alumnado puido recrear á protagonista da historia, un sapococho 🐢

Grazas a todas e todos por esta incrible celebracióin!

Ata a próxima aventura navegantes!

Espiñeiriña

RECREOS QUE ABREN PORTAS

Boas tardes lectorado!

Hai lugares que gardan historias entre as súas paredes. Lugares onde o tempo semella correr doutro xeito e onde cada recreo pode converterse nunha pequena aventura. Este curso, a nosa Biblioteca volveu ser un deses espazos máxicos. 

Cada martes e cada xoves, cando soaba o timbre do recreo, a Biblioteca abría as súas portas para recibir a quen quixese entrar. E foron moitos os que decidiron facer deste recuncho un lugar para descubrir, pensar, xogar, crear e compartir.

Os martes enchéronse de palabras. Sobre as mesas agardaban pasatempos en galego: sopa de letras, encrucillados, enigmas, debuxos, retos lingüísticos e propostas que convidaban a xogar coa nosa lingua. Entre letras escondidas e palabras por descubrir, o alumnado exercitaba a mente mentres gozaba dun tempo de lecer diferente. 

Os xoves, pola súa banda, convertéronse nun auténtico laboratorio de pensamento e estratexia. Os pasatempos matemáticos compartían momentos con xogos como o catro en raia, o xadrez, o xadrez de memoria, o Rummi Classic, os xogos de construción, o parchís e moitas propostas que enchían a Biblioteca de concentración, emoción e risas compartidas.

E, por suposto, tamén había quen prefería deixarse levar polo silencioso rumor das páxinas. Nenas e nenos que atopaban na lectura libre un refuxio tranquilo onde viaxar sen saír do seu asento.

O éxito de iniciativa foi notable. A cativada de 2º, 3º e 4º de Primaria foi a máis fiel destes recreos, facendo da Biblioteca un espazo vivo e cheo de actividade.

Pero detrás de cada mesa preparada, de cada libro colocado no seu lugar e de cada actividade organizada había un equipo moi especial. Os recreos estiveron dinamizados por un persoa do Equipo de Biblioteca e polas nosas persoas axudantes de Biblio, que se foron relevando entre os martes e os xoves para desempeñar as tarefas.

Foron elas e eles quen ordenaron os libros, repararon exemplares do Hospital de libros, recolleron suxestións, propuxeron actividades, explicáronlle ao actual alumnado de 3º en primeira persoa que significa formar parte deste grupo, compartiron as súas experiencias, en poucas palabras, contáronlle as tarefas que realizaban e transmitíronlle a ilusión de contribuír no funcionamento dun dos espazos máis especiais da escola.

Porque unha Biblioteca non é soamente un lugar onde viven os libros. É un porto onde atracan ideas, un faro que ilumina curiosidades, un obradoiro de soños e aprendizaxes compartidas. E durante estes recreos, unha vez máis, quedou demostrado que cada páxina, cada xogo, cada conversa e cada pequeno xesto axudan a construír unha comunidade lectora máis viva, participativa e feliz.

Grazas a todas as persoas que fixestes posible esta fermosa travesía.

O próxima curso agárdannos novas historias por escribir.

Espiñeiriña.

AI BEGOÑA, COMPAÑEIRA, MULLER LIBRE E FEMINISTA... LETRAS GALEGAS 20026

A celebración das LETRAS GALEGAS do ano que acaba de alborexar, conmemorou a figura e a obra da escritora, xornalista e activista BEGOÑA CAAMAÑO. Por iso, en Espiñeira decidimos adicarlle un día a esta muller curiosa, rebelde e vivaz.

Comezamos a xornada con dous pases dunha  obra de teatro, da man da compañía SURICATA TEATRO sobre a vida da autora homenaxeada.

- Un para E.I. 1º e 2º de E.P.

                                        

- E outro para 2º, 3º, 4º, 5º, e 6º de E.P.

A continuación, xuntámonos todo o colexio na sala de psicomotricidade para levar a cabo un PROGRAMA DE RADIO en directo, no que entrevistamos a figuras como BEGOÑA CAAMAÑO e BERNARDINO GRAÑA

Por ultimo, como a Begoña lle gustaba moito a música decidimos crearlle un cancioneiro con "cancións de sempre" que ao mesmo tempo estiveran relacionadas co noso PDI: 

"DO MAR NACE O AZUL DA VIDA"

Deste xeito, as cancións para cada curso foron as seguintes:

E.I:: "EU `PLANTEI A CANA VERDE"

1º E.P.: "GHAVOTA, GHAVOTA"

2º E.P.: "NA BEIRA DO MAR"

3º E.P.: "A RIENXEIRA"

4º E.P.: "CATRO VELLOS MARIÑEIROS"

5º E.P.: "OS DE MARÍN (Polo mar abaixo)"

6º E.P.: "RODABALLO"

E por último, cantamos e bailamos a xota de UXÍA E MALVELA, titulada "BEGOÑÍSIMA" traballada por todo o centro.

UN SAÚDO E...

ATA PRÓXIMA VIAXEIR@S

 

CLUB DE LECTURA: SOLILOQUIO DE SOÑOS

Boas tardes mundo!

Hai encontros que non rematan cando soa o timbre, senón que continúan... Hoxe tivo lugar a última xuntanza deste curso do Club de Lectura Soliloquio de Soños, compartida co alumnado de 4º e 5º de Primaria: arredor de trece lectoras e lectores apaixonados, viaxeiros incansables por mundos imaxinarios, aventuras imposibles e emocións verdadeiras.

Como xa é costume, reuníronse despois do recreo na Biblioteca. Esta abriulle as súas portas ao diálogo, á escoita e ao compartir. Un convite sinxelo: sentar, falar e deixar que os libros sigan vivos máis alá das súas páxinas.

Nesta ocasión, as mediadoras escolleron unha lectura moi especial, procurando tecer pontes co PDI do centro, Do mar nace o azul da vida. O libro elixido foi Los niños del frío, de Sérephine Menu, recentemente publicado e lido esta vez en castelán, despois de varias experiencias lectoras en galego. 

Unha aventura entre o frío e o corazón... A historia levou ao lectorado a territorios xeados onde un grupo de nenas e nenos aprende a sobrevivir nun entorno natural extremo, descubrindo o valor da amizade, da cooperación e do respecto pola natureza. Entre nevaradas, silencios brancos e desafíos inesperados, a novela tamén fala de medrar, de atopar o propio lugar no mundo e comprender que a valentía ás veces consiste simplemente en seguir adiante.

Nada máis chegar á Biblioteca, as primeiras palabras foron claras e espontáneas: Encantounos! Porque o libro reunía dous ingredientes imprescindibles para elas e eles: natureza e aventura. A pesar de ser un libro ben nutrido de páxinas, voou das súas mans coma unha gaivota levada polo vento.

O coloquio alongouse máis do previsto. Tanto, que a actividade preparada quedou nun segundo plano. E foi marabilloso. As palabras abriron paso a sentimentos, emocións atopadas, reflexións profundas e miradas brillantes que demostraban que a lectura, cando cala fondo, transforma.

Mentres dialogaban, tamén gozaban do padal, porque ler xuntas e xuntos sempre sabe mellor cando se comparte algo doce entre risas e comentarios cómplices.

Un curso entre libros... Houbo tamén tempo para mirar atrás e facer memoria das lecturas do curso. As mediadoras preguntaron que fora o mellor e que cambiarían... e a resposta resumiu todo o espírito do Club en dúas palabras inesquecibles:

Nada. Ler máis libros.

Con esa sinxela declaración péchase o Club de Lectura deste curso escolar, deixando unha sensación doce, case nostálxica, coma o final dun bo libro que non queremos abandonar. O próximo curso traerá novos capítulos: o actual alumnado de 4º compartirá experiencias co novo grupo que chegará a 4º dende 3º, mentres que quen agora está en 5º continuará a súa travesía lectora xa en 6º, navegando con autonomía por novos mares literarios. Ademais, tentarase explorar outros xéneros que espertan curiosidade e ilusión: o cómic, unha nova porta para seguir descubrindo historias.

Un recordo en petit comité.

Como curiosidade entrañable, unha das lectoras máis ardentes do Club non só compartía opinións exquisitas sobre as lecturas... tamén a súa vestimenta falaba por ela. Recollendo as palabras escritas no seu xersei, pódese definir perfectamente esta última reunión: un encontro en "petit comité", profundamente pracenteiro.

E así, despídese Soliloquio de Soños ata o vindeiro curso: coa Biblioteca chea de ecos, coas cadeiras aínda quentes de conversacións e coa certeza de que cada lectora e lector leva agora dentro unha nova historia que continuará medrando. 

Porque ler non é só páxinas.

É atoparse.

É viaxar.

É soñar en compañía.

E aquí, na Biblioteca, sempre haberá un lugar reservado para quen queira empezar esa viaxe.

Unha aperta,

Espiñeiriña.

OS MAIOS: COR, TRADICIÓN E CREATIVIDADE

O noso centro encheuse de primavera coa celebración dos Maios, unha das tradicións máis fermosas da nosa contorna. Este ano tivemos a sorte de contar coa colaboración da Asociación veciñal de O Piñeiro que nos cedeu tres estruturas para que o alumnado puidese darlle vida.

As nenas e os nenos de infantil e primaria traballaron con moita ilusión para coser, decorar e transformar estas estruturas en auténticas obras de arte. Utilizaron materiais propios da nosa tradición: xestas, pampillos, cáscaras de ovos e flores variadas aportadas polas nosas familias.

Deste xeito, nesta tradición contamos coa colaboración das familias, xa que a maior parte delas os días anteriores involucran ós nenos e ás nenas na recollida de elementos naturais decorativos de maneira respectuosa pola contorna.

Os maios luciron así de espectaculares!

Para acceder ó resultado final pincha na ligazón ao vídeo: 

https://youtube.com/shorts/Zr47KW1Rys8?si=81jl4atsOD2_o-hB

Ademais, acompañounos a música e a clásica canción de O Maio de Aldán.

Grazas á Asociación de veciños de O Piñeiro pola súa xenerosidade e grazas ás familias por acompañarnos sempre 💚

Un saudiño primaveral,

Espiñeiriña.

CLUB DE LECTURA: SOLILOQUIO DE SOÑOS

Bos días queridiñas lectoras e queridiños lectores!

A semana pasada tivo lugar a última xuntanza do grupo de 6º de Educación Primaria do Club de Lectura Soliloquio de Soños. Esta vez mudaron de lingua para seguir medrando como lectoras e lectores. Se o encontro anterior fora en galego, desta volta embarcáronse nunha aventura en castelán coa lectura de El barco escuela Tobermory de Alexander McCall Smith, unha historia chea de emoción, amizade e travesías que fixo navegar a imaxinación de todas e todos.

Ao redor das palabras, foron descubrindo personaxes, desfacendo misterios da trama e compartindo opinións sinceras: o que lles gustou, o que lles sorprendeu e tamén aquilo que quizais cambiarían se foran parte da historia. Porque ler é tamén conversar, escoitar, cuestionar e construír pensamento en comunidade. 

E como toda boa reunión lectora, as palabras mesturáronse cos sabores, facendo do momento un espazo cálido onde o pracer da lectura e o do padal camiñaron da man.

As mediadoras despediron ao grupo cunha mestura de orgullo e emoción. A cativada de 6º inicia agora novas rutas e o vindeiro curso xa non poderá compartir con esta escoliña estes intres de lectura compartida. Marchan, pero levan consigo algo que non pesa nas mochilas: o amor polos libros e as historias compartidas. 

Mentres tanto, Mar, participante do Club, está a dar os últimos retoques ao logo de Soliloquio de Soños, que moi pronto ocupará o seu lugar na Biblioteca, como símbolo dun espazo onde a literatura fala e o lectorado soña.

Porque cada lectura remata... pero sempre queda aberta a porta do seguinte soño.

Ata a próxima aventura!

Espiñeiriña.