Boas tardes queridiñas e queridiños!
Un novo curso comeza e, un ano máis, abrimos as portas a nosa Biblioteca o día 24 de outubro, Día das Bibliotecas escolares. Nese día a nosa escoliña encheuse de vida, de contos e de mares por descubrir. A Biblioteca, ese porto seguro onde as palabras agardan como barcos á deriva, abriu as súas portas para acoller ao alumnado nunha travesía polo océano do saber.
Neste sentido, baixo o lema do noso Proxecto Documental Integrado deste ano "Do mar nace o azul da vida", o Equipo de Biblioteca organizou unha xornada chea de obradoiros e soños compartidos. Para iso, contamos coa axuda inestimable de Irene, Marián, Pablo, Antonio e Seso, familias que coa súa luz guiaron á nosa pequena tripulación, como fan os faros nas noites de néboa.
A continuación, no relativo aos obradoiros, no primeiro a cativada de Educación Infantil mergullouse en mares de cor, creando fondos mariños con pasta de cores que se transformaban en corais de fantasía. No segundo, estampaban camisetas con animais mariños, mentres as súas mans deixaban pegadas de creatividade. Por último, no terceiro que tivo lugar na Biblioteca, gozaron dun contacontos onde os libros de Rainbow warrior e Un peixe é un peixe se deron a man para navegar xuntos entre risas e soños.
- Estampación de camisetas:
- Contacontos:
En canto as nenas e aos nenos de 1º, 2º e 3º de Educación Primaria, exploraron as curiosidades mariñas a través dun Kahoot, descubrindo se un polbo pode meterse nunha botella e outros segredos que agocha o fondo do mar. Despois, continuaron estampando camisetas mariñas e remataron creando cadros suxeita-papeis decorados con plastilina.
- Kahoot:
- Estampación de camisetas mariñas:
- Cadro suxeita-papeis:
Mentres tanto, a pequena marea de 4º, 5º e 6º de Educación Primaria converteuse nunha auténtica navegante: desfrutou xogando ao Kahoot das curiosidades mariñas, aprendeu a facer nós mariñeiros e descubriu o fascinante mundo dos faros e das cartas de navegación. Pablo, coa súa paixón polo mundo náutico, axudoulle a coñecer os faros da ría de Vigo, a interpretar profundidades e a entender como a luz dun faro pode guiarnos incluso cando o mar se volve escuro.
- Kahoot:
- Nós mariñeiros:
- Faros e cartas de navegación:
A nivel de centro, un grande mural xurdiu das mans do noso alumnado que navega polos mares do coñecemento, rodeado de seres mariños que nos lembran que aprender é tamén unha forma de vivir.
Finalmente, a xornada rematou cun pequeno agasallo para as persoas colaboradoras: un libro de poesía, símbolo de gratitude. Na primeira páxina, unha dedicatoria dicía: No mar da escola, onde cada día aprendemos a navegar entre soños e descubertas, hai faros que nos guían coas súa luz. Dende o Equipo de Biblioteca queremos agradecerche a túa xenerosidade e traballo. Grazas por tender pontes entre a familia e a escola, por facer do encontro un espazo de mar aberto, por traer ás mans do alumnado a beleza do saber compartido. Cada obradoiro foi unha onda de ilusión que deixou pegada nas nosas mareas pequenas. E nós, agradecidas e agradecidos, agasallámosche cun libro de poesía, para que sigas facendo da vida un poema, e dos días comúns, versos que brillen.
E así, entre versos e mareas, pechamos este día de ilusión, abrindo de par en par as portas da nosa Biblioteca. Un lugar onde os libros son velas e o alumnado, vento que empurra o noso barco escolar cara novos horizontes...
Ata a próxima!
Espiñeiriña.
.jpg)
