23.6.19

MERCADILLO SOLIDARIO

Dende o luns 17 ata o venres 21 de xuño de 2019, puxemos á disposición da comunidade educativa un mercadillo de libros resultado do expurgo realizado na biblioteca do cole.



O luns varias traballadoras da protectora xunto con dous policías locais, impartiron unha charla dirixida a todo o alumnado co fin de crear conciencia.

Ese mesmo día, comezamos co mercadillo solidario de libros nas dependencias do CEIP Plurilingüe da Espiñeira e invitamos á participación da seguinte maneira:
Houbo unha exposición de libros para diferentes tipos de público (segundo a idade ou preferencias literarias). Así, a actividade consistiu nun troco, é dicir, ti levas un libro e a cambio podes entregar: comida para cans, correas, arneses, colares...


Grazas á comunidade educativa pola vosa participación e ás traballadoras/es da protectora de animáis do Morrazo polo seu magnífico labor.

Informarvos de que pronto comezarán as obras de ampliación da nosa biblioteca! Manterémosvos informad@s!


Desfrutade das vacacións!!!

Un saúdo,
Espiñeiriña.

6.6.19

LETRAS GALEGAS 2019

O xoves 16 de maio celebramos no noso cole o Día das Letras Galegas. Este curso quixemos promover lecturas en galego contando co atractivo do espazo natural da nosa contorna.
 



Despois destas lecturas nun espazo fermoso, fomos cara o salón de actos para gozar duns vídeos elaborados polo alumnado de 3º a 6º de Primaria. O tema tratado non puido ser outro que a vida e obras do autor homenaxeado: Antonio Fraguas Fraguas.

 

Se queredes ver os vídeos creados, só tendes que acceder a este enlace e consultar a entrada titulada "Letras Galegas": https://pluriespinheira.wixsite.com/proxectos/copia-de-contexto-lingueistico

Previo á celebración, realizamos algunhas actividades dedicadas ó autor. Moitas das clases do cole realizaron un xogo de pistas en gran grupo ou en pequeno grupo, como foi o caso do alumnado de infantil. As actividades tiveron como punto de referencia os pósters de Antonio Fraguas facilitados pola Consellería.







Durante toda a semana sacamos ó patio libros en galego, a maioría deles relacionados con autoras e autores homenaxeados.




Por último, temos que comentar o éxito entre o alumnado do libro-CD "Canta, miña pedra, canta", en homenaxe a Antonio Fraguas.


Un saúdo e deica pronto navegantes!

Espiñeiriña.

3.5.19

VISITA Á BIBLIOTECA PÚBLICA DE ALDÁN

Acompañados polo bo tempo, esta semana organizamos unha saída á biblioteca de Aldán. A persoa encargada da mesma foi moi amable con todos nós e acolleunos durante varias xornadas lectivas.

A bibliotecaria organizou distintas actividades para o alumnado de diferentes idades e entregoulles un carné da biblioteca pública a todos os rapaces e rapazas que aínda non o tiñan.


O alumnado de infantil puido gozar dun contacontos súper divertido, onde un grupo de cinco nenos e nenas voluntarias, exerceron de protagonistas da historia. O libro narrado foi o de A tartaruga que quería durmir. Tamén desfrutaron dun momento de lectura libre e fixeron debuxos sobre o conto.






Para os nenos e nenas de 1º e 2º de primaria tamén houbo un contacontos e realizaron o empréstito de libros.





O alumnado de 3º e 4º de primaria entretivéronse cun xogo de pistas moi literario que a bibliotecaria lles propuso e tamén tiveron tempo para empregar os recursos que a biblioteca nos ofrece.




Ademais, de camiño á biblioteca os nenos e nenas de infantil atopáronse con estes animaliños..., que ilusión lles fixo!



Moitísimas grazas á bibliotecaria de Aldán por acollernos e tratarnos tan ben!
Deica pronto!!!





24.4.19

DÍA DO LIBRO NA ESPIÑEIRA

Hoxe foi un día especial na Espiñeira porque estabamos de celebración. Así, iniciamos o día do libro con varias propostas de actividades onde participou todo alumnado e profesorado da escola.

Póster realizado para a celebración.

Primeiro comezamos co BINGO LITERARIO, o cal o levamos a cabo por niveis:

O alumnado de 3º a 6º de Primaria foron os primeiros en facelo. O libro narrado foi o de Pioneiras.


- Modelo de cartón:


Seguidamente chegou o turno dos máis peques do cole: o alumnado de infantil! Nesta ocasión contamos coa axuda do alumnado axudante de biblioteca. Elas foron as que nos realizaron a lectura do conto PILÚ-PILÚ. O alumnado estivo ben atento e viviron con emoción o momento de cantar BINGO.






- Modelo de cartón:



Por último, acudiron á cita os de 1º e 2º de Primaria. A lectura correu a cargo da auxiliar de conversa Danielle, xa que o libro elixido foi The very hungry caterpillar.


- Modelo de cartón:


Pero a nosa celebración non acabou aquí. Despois do recreo gozamos dunhas lecturas aproveitando o espazo interior da escola (o tempo non nos permitiu saír o exterior). Dado o interese amosado pola rapazada podemos dicir que o APADRIÑAMENTO LECTOR resultou ser un éxito. Ademais, algúns e algunhas atrevéronse a retratar a lectura en forma de debuxo.




 






Navegantes, espero ter boas novas pronto! Desfrutade moito do pracer da lectura!

Un saúdo,

Espiñeiriña.