OS MAIOS: COR, TRADICIÓN E CREATIVIDADE

O noso centro encheuse de primavera coa celebración dos Maios, unha das tradicións máis fermosas da nosa contorna. Este ano tivemos a sorte de contar coa colaboración da Asociación veciñal de O Piñeiro que nos cedeu tres estruturas para que o alumnado puidese darlle vida.

As nenas e os nenos de infantil e primaria traballaron con moita ilusión para coser, decorar e transformar estas estruturas en auténticas obras de arte. Utilizaron materiais propios da nosa tradición: xestas, pampillos, cáscaras de ovos e flores variadas aportadas polas nosas familias.

Deste xeito, nesta tradición contamos coa colaboración das familias, xa que a maior parte delas os días anteriores involucran ós nenos e ás nenas na recollida de elementos naturais decorativos de maneira respectuosa pola contorna.

Os maios luciron así de espectaculares!

Para acceder ó resultado final pincha na ligazón ao vídeo: 

https://youtube.com/shorts/Zr47KW1Rys8?si=81jl4atsOD2_o-hB

Ademais, acompañounos a música e a clásica canción de O Maio de Aldán.

"Eiqui vén o Maio vestido de xestas, pra lle dar as grazas a señora Teresa.

Eiqui vén o Maio vestido de flores, pra llegar as grazas a señora Dolores.

Eiqui vén o Maio por riba dos tellados, eiqui vén o Maio de roubar os espantallos.

Eiqui vén o Maio por riba das testas, eiqui vén o Maio vestidos de xestas.

Eiqui vén o Maio pola Costa da Vela, eiqui vén o Maio camiño de Compostela.

Eiqui vén o Maio pola pescadería, eiqui vén o Maio camiño da Romaría.

Eiqui vén o Maio polos muros da eira, eiqui vén o Maio do colexio da Espiñeira."

Grazas á Asociación de veciños de O Piñeiro pola súa xenerosidade e grazas ás familias por acompañarnos sempre 💚

Un saudiño primaveral,

Espiñeiriña.