Bos días navegantes!
Pois hoxe estou aquí para falar dun fermosa palabra, a Paz. Vouvos propor un reto: que é a Paz? Pois, como ben sabedes ten moitas acepcións... é incrible que sexa tan pequeniña e que exprese tanto!
Neste sentido, a Paz está ligada ao amor, á solidariedade, á esperanza,... en poucas palabras, á vida. En relación á esto último, pódese dicir que é de facil significado pero de difícil entendemento para a sociedade actual. Non podemos esquecer que se o noso fogar queremos construir, precisamos dun chan que é a liberdade e a harmonía, dunhas paredes que son a tolerancia e o respecto e dun teito que é a paz.
Todos estes aspectos cobran vida non soamente no Día da Paz e da Non Violencia Escolar, senón no quefacer desta escoliña.
Como actividade inicial o Equipo de Biblioteca propuxo unha serie de tarefas a cada persoa titora. Unha delas foi que o seu alumnado reflexionara primeiro de xeito oral e despois de xeito escrito sobre que é o concepto de Paz. Despois, cada aula elaborou fermosas definicións, entre elas cómpre destacar a seguinte: a Paz ten moitas formas, cores e palabras, sabedes cales son? pois empatía, amizade, non violencia, non guerras, tranquilidade, compartir, infancia, amor, axuda, igualidade, liberdade, protección e compañía. Cada grupo escribiu as súas palabras nunha grúa e todas elas foron penduradas dentro dunha gaiola. O obxectivo foi liberar todos eses pensamentos, ideas, problemas,... para así ser libre xa que da Liberdade brota a forza e da harmonía a Paz.
Este último foi o lema que empregamos para a elaboración conxunta do mural tendo en conta que tamén é o Día da ilustración. Nel pódese ler distintas definicións do que é a Paz, ver diferentes grúas que conteñen palabras que falan de situacións onde a Paz non está presente e posibles solucións así como desfrutar das expresións corporais de liberdade que transmite a catividada da nosa escola.
Así mesmo, cada persoa titora convidou ao seu alumnado a pensar sobre que é a crueldade e a ausencia de Paz con algunhas imaxes ilustradas das caixas de filosofía para nenas e nenos de Wonder Ponder. Posteriormente, cada menor elaborou unha proposta coas súas respectivas preguntas e despois a escollida foi enviada as pioneiras deste proxecto.
Ademais, no Recreo na Biblio as nosas axudantes de 4º e 5º de Educación Primaria convidaron ao resto de compañeiras e compañeiros a un contacontos para desfrutar do pracer da literatura como unha das mellores ferramentas para ser libre, pensar e ocupar o tempo de lecer.
Finalmente, nunha das nosas zonas do exterior da escola, desfrutamos deste día lendo as definicións da Paz de cada aula plamadas nas grúas, escoitando á cativada de 2º de Educación Primaria recitar o poema de Solo tres letras de Gloria Fuertes e cantando a nosa canción de Convive con Cautela.
E, ata aquí por hoxe!
Espiñeiriña.
